ՀՀ արդարադատության նախարարության քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների Խումբը 2016թ.-ից բարձրաձայնում է Խմբի աշխատանքի սահմանափակումների և խոչընդոտումների վերաբերյալ: Ավելի քան 10 տարիների գործունեության ընթացքում Խմբի աշխատանքները երբեք այնպես չեն խոչընդոտվել, ինչպես 2016 թ. ընթացքում: Խումբը ստանում է բազմաթիվ ահազանգեր ազատազրկված անձանցից և նրանց հարազատներից՝ քրեակատարողական հիմնարկներում մարդու իրավունքների խախտումների դեպքերի վերաբերյալ, սակայն այցելություններ կատարելիս Խմբի աշխատանքները խոչընդոտվում են հիմնարկների աշխատակիցների կողմից։
Խմբի աշխատանքների խոչընդոտման արատավոր պրակտիկան սկիզբ է առել 2016թ. մարտ ամսից և շարունակվում է մինչ օրս։ 2016թ․-ից ՀՀ ԱՆ քրեակատարողական ծառայությունը որդեգրեց մի դիրքորոշում, որով Խմբի անդամներին արգելվեց այցելել և առանձնազրույց ունենալ ազատությունից զրկված այն անձանց հետ, որոնց նկատմամբ քննիչի կողմից դրված է արգելանք արտաքին աշխարհի հետ շփումների վրա: Նախկինում այդ արգելքը Խմբի անդամների վրա չէր տարածվում:
Հատկանշական է, որ սահմանափակումները կատարվում են մասնավորապես քաղաքական հնչեղություն ստացած գործերով կալանավորված անձանց պահման պայմանները դիտարկելիս՝ քննիչի կողմից սահմանված կալանավորված անձի՝ արտաքին աշխարհի հետ կապը արգելելու վերաբերյալ որոշման հիմնավորմամբ:
Խմբի անդամները ՀՀ ԱՆ քրեակատարողական հիմնարկներ կատարած այցելությունների ընթացքում հանդիպումներ են ունեցել տարբեր արարքներ կատարելու համար պատժախցերում հայտնված անձանց հետ՝ պարզելու պատժախուց տեղափոխելու հիմքերը: Խմբի անդամների ունեցած հանդիպումներից պարզ է դարձել, որ դատապարտված և կալանավորված անձանց նկատմամբ կիրառված տույժերի գերակշռող մասը կիրառվել է արգելված իր՝ բջջային հեռախոս պահելու համար:
2018թ․ ՀՀ ԱՆ քրեակատարողական հիմնարկներում արձանագրվել է հացադուլ հայտարարելու 430 դեպք, որը 2017թ․ համեմատությամբ ավել է 36-ով։
2018թ. ՀՀ ԱՆ քրեակատարողական հիմնարկներում արձանագրվել է ինքնավնասման 612 դեպք։ Հաշվետու տարում 2016թ․ համեմատությամբ ինքնավնասման դեպքերը նվազել են 267-ով, իսկ 2017թ․ համեմատությամբ՝ ավելացել 5-ով։ Այսպես, 2016թ․ Հայաստանի բանտերում գրանցվել է ինքնավնասման 879 դեպք, որից կանխվել է 135-ը։ Նշված ժամանակահատվածում շուրջ 250 ինքնավնասման դեպքերը կատարվել են «Նուբարաշեն» ՔԿՀ-ի 2 դատապարտյալի կողմից։ Իսկ 2017թ. արձանագրված ինքնավնասման դեպքերի թիվը 607 է, որից կանխվել է 190-ը։
ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող դիտորդների խմբի անդամները ՀՀ ԱՆ «Նուբարաշեն» ՔԿՀ կատարած այցելության ժամանակ հանդիպել են դատապարտյալ Ս.Մ.-ին, ով Խմբի անդամներին տեղեկացրել է, որ 2018թ. դեկտեմբերի 31-ին դանակ է կուլ տվել, որը մինչև հիմա իր որովայնում է։