ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամները (այսուհետ՝ Խումբ) ստացված ահազանգերի հիման վրա 2022 թ․դեկտեմբերի 14-ին ՀՀ ԱՆ «Արմավիր» ՔԿՀ կատարած այցելության ընթացքում առանձնազրույց են ունեցել կալանքի տակ գտնվող Ռ.Ս.-ի և Է.Վ.-ի հետ և տեղեկացել, որ վերջիններս ունեն առողջական խնդիրներ։

Մասնավորապես, Խմբի անդամները Ռ․ Ս․-ի հետ զրույցի ընթացքում տեղեկացել են, որ ՀՀ ԱՆ «Արմավիր» ՔԿՀ կատարած այցին նախորդող շաբաթվա ընթացքում վերջինս ենթարկվել է «Մագնիսա-ռեզոնանսային տոմոգրաֆիա (ՄՌՏ)» հետազոտության։ Նա Խմբի անդամներին բանավոր հայտնել է, որ իր մոտ ախտորոշվել են մի շարք խնդիրներ, որոնք վտանգ են ներկայացնում հետագայում հենաշարժողական խնդիրների առաջացման համար։ Ըստ Ռ․ Ս․-ի՝ հետազոտության արդյունքում իր մոտ ախտորոշվել է 5-րդ ողի վրա առկա սերտաճում, ինչպես նաև ողնուղեղի խոռոչի մեջ գոյացած պարկ, որի արդյունքում իր վերջույթներն «անջատվում են» և չի կարողանում կառավարել իր շարժումները։ Ըստ Ռ․ Ս․-ի՝ երկարատև նման վիճակում գտնվելը և հետևողական բուժում չստանալը կգամի իրեն սայլակին։

Ռ․Ս․-ը հայտնել է նաև, որ քրեակատարողական հիմնարկում որևէ բուժում չի ստանում: Մինչև քրեակատարողական հիմնարկում գտնվելը՝ ՀՀ պաշտպանության նախարարությունում աշխատելու ժամանակահատվածում պարբերաբար անցել է բժշկական հետազոտություններ, որոնք մշտապես ամրագրել են, որ ինքն ունի «տիեզերագնացի առողջություն»: Ըստ Ռ․Ս․-ի՝ իր մոտ առկա առողջական վիճակի վատթարացումը սկսվել է իրեն բերման ենթարկելիս և ոստիկանության բաժանմունքում ծեծի ենթարկվելուց հետո և խորացել է քրեակատարողական հիմնարկում գտնվելու ընթացքում:

Զրույցի ընթացքում Ռ․Ս․-ը նաև հաստատել է13․12․2022 թ․ Խմբի կողմից ՀՀ ԱՆ ներկայացված 22-58 գրությամբ փոխանցված տեղեկատվությունը՝ կապված անվտանգության աշխատակցի հետ ունեցած ընդհարման հետ՝ պնդելով հարցի քննարկման կարևորությունը։


2022 թ. դեկտեմբերի 13-ին ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խումբը (այսուհետ՝ Խումբ) «Հանցագործության մասին հաղորդում» վերտառությամբ գրություն էր ստացել «Արմավիր» ՔԿՀ-ում գտնվող ազատազրկված Ռ. Ս.-ի ծնողներից, ովքեր խնդրում էին վերականգնել իրենց որդու անվտանգությունը և իրավունքների պաշտպանվածությունը: 

Գրության մեջ մասնավորապես նշված էր, որ «12.12.2022 թ. 12:00-12:20-ի սահմաններում «Արմավիր» ՔԿՀ 4-րդ մասնաշենքի անվտանգության առաջատար մասնագետ մայոր Ա․ Գ․-ը անազաատության մեջ գտնվող Ռ. Ս.-ի հանդեպ հերթական անգամ, ասես թշնամական, ոչ կանոնադրական մոտեցում է դրսևորել՝ հրապարակայնորեն հայհոյել, վիրավորել ու այդպիսով նվաստացրել է իր կարգավիճակով կաշկանդված ու այդպիսով ծայրահեղ անպաշտպան անձին, ձերբակալման օրից նաև առողջության նյարդային խնդիրներ ձեռք բերած անձին վիրավորել է, հոգեկան ցավ պատճառել՝ շատ լավ գիտակցելով, որ նրանից հակադարձում չի ստանալու: Եվ սա այն բանի համար, որ մարդը պահանջել է իր հետ հարգալից վերաբերվել: Ու քիչ է, որ, փաստորեն, հոգեկան խոշտանգման է ենթարկում, մի բան էլ հաջողում է ղեկավարությանը սադրել՝ վերջինիս նկատմամբ տույժեր կիրառելու»:

Դիտորդները, գտնելով, որ Խմբին հայտնված դեպքը վերաբերում է անազատության մեջ գտնվող անձի՝ խոշտանգումներից և այլ դաժան, անմարդկային կամ նվաստացնող վերաբերմունքից զերծ մնալու հիմնարար իրավունքի խախտմանը, որը պահանջում է անհապաղ ձեռնարկել անհրաժեշտ, բավարար և ամբողջական միջոցառումներ՝ դեպքը բացահայտելու, մեղավորներին հայտնաբերելու և պատասխանատվության ենթարկելու, իրավունքը խախտված անձի իրավունքները վերականգնելու համար, դիմել էին ՀՀ ԱՆ-ին։ 

ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամները (այսուհետ՝ Խումբ) «Դատապարտյալների հիվանդանոց» ՔԿՀ կատարած այցելության ժամանակ առանձնազրույց են ունեցել անազատության մեջ գտնվող Ա. Չ.-ի հետ և տեղեկացել, որ վերջինս ունի լսողական խնդիր և, դրանով պայմանավորված, լսողական աջակցող սարք օգտագործելու կարիք։ Սակայն հաշմանդամության խումբ չունենալու պատճառով պետական միջոցների հաշվին չի կարողանում այն ձեռք բերել, իսկ սեփական միջոցները բավարար չեն։

Հաշվի առնելով վերոգրյալը՝ Խումբը դիմել է ՀՀ ԱՆ-ը՝ առաջարկելով ձեռնարկել անհրաժեշտ, բավարար և ամբողջական միջոցներ՝ ապահովելու պետության վերահսկողության ներքո գտնվող առողջական խնդիրներ ունեցող անձին վերականգնողական օգնության տրամադրումը՝ անհրաժեշտ լսողական սարք տրամադրելու միջոցով: Նաև ապահովել առողջական վիճակի հետ կապված անհրաժեշտ հետազոտություն և ծանոթանցնել հաշմանդամության խմբի սահմանման համար փորձաքննության հանձնաժողովին դիմելու կարգին։

Ի պատասխան այս գրության և հիմքում ունենալով ՀՀ արդարադատության նախարարության քրեակատարողական ծառայությունից և «Քրեակատարողական բժշկության կենտրոն» ՊՈԱԿ-ից ստացված տվյալները՝ ՀՀ ԱՆ-ից հայտնել են, որ Ա․ Մ․ Չ․-ը «Քրեակատարողական բժշկության կենտրոն» ՊՈԱԿ-ի՝ ՀՀ ԱՆ «Դատապարտյալների հիվանդանոց» քրեակատարողական հիմնարկում տեղակայված ստորաբաժանումում ենթարկվել է անհրաժեշտ հետազոտությունների և խորհրդատվությունների, որտեղ, որպես հիմնական հիվանդություններին ուղեկցող հիվանդություն, ախտորոշված է «Երկկողմանի սենսոնևրալ ծանրալսություն 3-4 աստ.»:

ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամները (այսուհետ՝ Խումբ) 2022 թ․նոյեմբերի 11-ին ՀՀ ԱՆ «Նուբարաշեն» ՔԿՀ կատարած այցելության ժամանակ առանձնազրույց են ունեցել անազատության մեջ գտնվող Ս. Ք. Մ.-ի հետ և տեղեկացել, որ վերջինս 2022 թ. նոյեմբերի 8-ից սկսել է հացադուլ՝ կապված անհրաժեշտ բուժօգնություն չստանալու, այդ թվում՝ այդ նպատակով քաղաքացիական բուժհաստատություն տեղափոխումը չապահովելու հետ: Այցից մոտ քսան օր առաջ Ս. Մ.-ը կատարել է ինքնավնասում՝ կուլ է տվել դանակ, ասեղ, ասեղի միջոցով ծակել է իրեն, կտրել ձախ թևը: Ս. Մ.-ը Խմբին տեղեկացրել է, որ օտար մարմինները դեռևս գտնվում են իր օրգանիզմում և տվել էր համաձայնություն՝ օտար մարմիններն օրգանիզմից հանելու վերաբերյալ, այդ թվում՝ վիրահատական ճանապարհով, եթե բժշկական այլ միջամտությամբ դրա իրականացումը հնարավոր չէ ապահովել:

Վերոգրյալի հիման վրա Խումբը դիմել էր ՀՀ արդարադատության նախարարություն՝ առաջարկելով ձեռնարկել անհրաժեշտ, բավարար և ամբողջական միջոցներ՝ ապահովելու Ս․Ք․Մ․-ի՝ պատշաճ բժշկական օգնություն ստանալու իրավունքը, այդ թվում՝ ըստ անհրաժեշտության ապահովել Ս․Մ․-ի տեղափոխումը հատուկ մասնագիտացված կամ քաղաքացիական բուժհաստատություն, ապահովել վերջինիս անհրաժեշտ բուժօգնության տարամադրումը, բժշկական հետազոտությունների իրականացումը, օրգանիզմից օտար մարմինների հեռացումը: Ըստ անհրաժեշտության նաև ապահովել Ս․Մ․-ի հետ հոգեբանական աշխատանքների կազմակերպումը, այդ թվում՝ ինքնավնասումներ կատարելու հանգամանքով պայմանավորված հոգեբույժի մշտական վերահսկողության իրականացում:

ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամները (այսուհետ՝ Խումբ) 2022 թ․ նոյեմբերի 14-ին ՀՀ ԱՆ «Նուբարաշեն» ՔԿՀ կատարած այցելության ժամանակ տեսակցել են անազատության մեջ գտնվող Վ. Ա.-ին և Ս. Ա.-ին: Վ. Ա.-ը Խմբին հայտնել է, որ ունի առողջական խնդիրներ և դրանցով պայմանավորված` բժշկական հետազոտությունների կարիք։ Դեռևս ազատության մեջ գտնվելու ժամանակահատվածում Վ․ Ա․-ի մոտ ախտորոշվել է «Հեմոլիտիկ-ուռեմիկ համախտանիշ»։ Վ․ Ա․-ը միաժամանակ հայտնել է, որ առողջական խնդիրներով պայմանավորված՝ իրեն վատ է զգում, քնած վիճակում մարմինն ամբողջովին սառչում է, ունենում է մարմնի ցավեր, հոդացավեր, որովայնային և երիկամային հատվածներում ցավեր, ինչպես նաև գլխացավեր, ճգնաժամային իրավիճակում ունենում է նաև դողէրոցք, կրիզ։ Ըստ Վ․ Ա․-ի՝ ինքնազգացողությունը գնալով վատանում է, և հավանականությունը մեծ է, որ նոր, ավելի ուժգին կրիզ կարող է լինել։

Ս. Ա.-ը Խմբին տեղեկացրել է, որ ունի դիմածնոտային խնդիր։ Ըստ Ս. Ա.-ի՝ ատամի հեռացման արդյունքում իր մոտ առաջացել է դիմածնոտային խնդիր, ներկայումս ունի երկարատև գլխացավեր։ Ս. Ա.-ը հայտնել է, որ 2022 թ․ հոկտեմբերի 21-ին դիմել է իր հաշվին համակարգչային տոմոգրաֆիա անցնելու խնդրանքով, սակայն Խմբի այցելության օրվա դրությամբ վերջինս համապատասխան հետազոտություն չէր անցել, ինչը, ըստ նրա, պատճառաբանվել էր հերթագրվածների քանակով։ 

Վերոգրյալի հիման վրա Խումբը դիմել է ՀՀ արդարադատության նախարարությանը՝ առաջարկելով ձեռնարկել անհրաժեշտ, բավարար և ամբողջական միջոցներ՝ ապահովելու Վ. Ա.-ի և Ս. Ա.-ի պատշաճ բժշկական օգնություն և սպասարկում ստանալու իրավունքը, այդ թվում ապահովել Վ. Ա.-ի մոտ առկա առողջական խնդիրների ախտորոշմանն ուղղված համալիր միջոցառումների իրականացումը, բուժական, վերականգնողական բուժման անցկացումը և սեղմ ժամկետում ապահովել Ս. Ա.-ին անհրաժեշտ բժշկական հետազոտությունների անցկացումը։

Կայքը գործում է «Բաց հասարակության հիմնադրամներ-Հայաստան»
գրասենյակի ֆինանսական աջակցությամբ

Հասարակական դիտորդական խումբ © 2016
Բոլոր իրավունքները պաշտպանված են

Search